Ağdam, 12 mart, Tahir Ağaməmmədov, AZƏRTAC
Prezident İlham Əliyevin Sərəncamına əsasən cari ildə Ağdam rayonunun Qaradağlı, İkinci Yüzbaşılı, Paşabəyli, Çəmənli, Sarıcalı, Kiçikli, Böyükbəyli, Alıbəyli, Ballar, Ergi, Qəhrəmanbəyli, Kolqışlaq, Ayaq Qərvənd, Əfətli, Üçoğlan kəndlərində, ümumilikdə 20 ədəd yeni subartezian quyusu qazılacaq.
Ağdam mexaniki suvarma idarəsindən AZƏRTAC-a bildiriblər ki, cəbhə xəttində yerləşən rayonda suvarma mövsümünə hazırlıq işləri davam etdirilir, hidrotexniki qurğular saz vəziyyətə gətirilir. Rayonun işğal olunmamış hissəsində olan 31 min 800 hektar əkin sahəsi 764 ədəd subartezian quyusu, 4 nasos stansiyası, 11 kəhriz, 365 kilometr suvarma kanalı, 46,6 kilometr kollektor-drenaj şəbəkəsi, 177 ədəd hidrotexniki qurğu vasitəsilə suvarılır. 2015-ci ildə rayonda 13 min 500 hektar dənli, 11 min 200 hektar yemlik, 96 hektar çoxillik bitkilərin, 110 hektar pambıq, 55 hektar şəkər çuğunduru, 2650 hektar təkrar əkin və 420 hektar bağ sahələrinin suvarılması nəzərdə tutulur.
Qeyd edək ki, Prezident İlham Əliyevin müvafiq Sərəncamına əsasən ötən il rayonda 20 ədəd subartezian quyusu qazılıb.