Bakı, 11 mart, AZƏRTAC
Tələbə Qəbulu üzrə Dövlət Komissiyası (TQDK) martın 15-də 2015/2016-cı tədris ili üçün Azərbaycan Respublikasında baza ali tibb təhsili əsasında həkim-mütəxəssislərin hazırlanması məqsədilə rezidentura səviyyəsinə qəbul imtahanının birinci mərhələsini keçirir. TQDK-dan AZƏRTAC-a bildirilib ki, imtahan Bakı şəhərində üç binada – Azərbaycan Tibb Universitetinin birinci və beşinci tədris binaları və Bakı Qızlar Universitetində, eləcə də Naxçıvan şəhərində bir binada – Naxçıvan Dövlət Universitetinin Hüquq korpusunda keçirilir və bütün binalarda eyni vaxtda – saat 11:00-da başlanır.
Namizədlər martın 4-dən etibarən öz elektron ərizələrinə daxil olaraq “Namizədin imtahana buraxılış vərəqəsi”ni çap edirlər.
İmtahanda iştirak etmək üçün namizədin imtahana buraxılış vərəqəsi və şəxsiyyəti təsdiqləyən sənədin əsli mütləq təqdim olunmalıdır.
Göstərilən sənədlərdən biri olmadıqda və ya sənədlər arasında uyğunsuzluq aşkarlandıqda namizəd imtahana buraxılmayacaq.
Birinci mərhələdə namizədlərə baza ali tibb təhsili istiqamətinə müvafiq olaraq qəbul proqramı əsasında baza fənləri üzrə 100 test tapşırığı təqdim edilir və hər bir test tapşırığının düzgün cavabı bir balla qiymətləndirilir, səhv cavablar namizədin imtahan nəticəsinə təsir göstərmir. İmtahan suallarının cavablandırılmasına 2 saat 30 dəqiqə vaxt ayrılır.
Rezidentura səviyyəsinə qəbul imtahanının ikinci mərhələsi iyulun 7-də keçiriləcək və bu mərhələyə imtahanın birinci mərhələsində topladığı bal 40-dan az olmayan namizədlər buraxılacaq.
İmtahanda iştirak etmək üçün ərizə qəbulu internet vasitəsilə 2015-ci il fevralın 16-dan 23-dək aparılıb və 1.245 namizəd elektron ərizə dolduraraq təsdiqləyib. Onlardan 913-ü qız, 332-si isə oğlanlardır. Namizədlərdən 1050-si Azərbaycan bölməsinin, 195-i rus bölməsinin, 552-si cari ilin, 693-ü isə əvvəlki illərin məzunudur.
Bakı şəhərində 1.213, Naxçıvan şəhərində isə 32 namizədin imtahan verəcəyi nəzərdə tutulur. İmtahanların idarə olunması üçün 18 imtahan rəhbəri, 132 zal nəzarətçisi ayrılıb.
Qeyd edək ki, Azərbaycan Tibb Universitetinin hərbi tibb fakültəsinin məzunları üçün rezidenturaya qəbul imtahanının hər iki mərhələsi iyulda keçiriləcək.
Səhifənin qısa keçidi: http://www.tqdk.gov.az/~9nawd