Bakı, 10 mart, AZƏRTAC
Martın 10-da Qiymətli Kağızlar üzrə Dövlət Komitəsinin (QKDK) nəzdində fəaliyyət göstərən Kapital Bazarı üzrə Təlim Mərkəzi Azərbaycan Dövlət İqtisad Universitetində (ADİU) maliyyə üzrə təlimlərə başlayıb.
Universitetdən AZƏRTAC-a bildirilib ki, tədbirdə ADİU-nun təcrübə və işədüzəltmə şöbəsinin rəhbəri Fuad Əliyev bildirib ki, bu təlimlərlə ADİU ilə QKDK arasında yanvarın 28-də imzalanan təhsil, elm və təlim-tədris sahəsində birgə inkişaf fəaliyyətinə dair anlaşma memorandumunun icrasına başlanılır. Təlimlərdən başqa, memorandum çərçivəsində bu günlərdə ADİU-nun 30 tələbəsi QKDK-da istehsalat təcrübəsinə başlayacaq. Həmçinin ADİU-nun qiymətli kağızlar bazarı üzrə tədris proqramlarının təkmilləşdirilməsi, müasir tələblərə uyğunlaşdırılması üzərində Komitənin ekspertləri ilə birgə iş aparılır.
Kapital Bazarı üzrə Təlim Mərkəzinin direktoru Cəmilə Məmmədova təlimlərin məqsədindən danışıb. Bildirib ki, burada tələbələr maliyyə bazarları haqqında təməl bilikləri əldə edəcəklər. Növbəti mərhələdə isə elçilərin (Kapital bazarının bələdçiləri) seçilməsinə başlanılacaq. Elçilər yüksək nəticə göstərən tələbələr arasından seçiləcək və onlara öyrəndiklərini tətbiq etmək imkanı yaradılacaq. Sonuncu mərhələdə isə yüksək nəticə göstərən tələbələr QKDK-nın funksional şöbələrində, Milli Depozit Mərkəzi və Bakı Fond Birjasında, broker şirkətlərində iş təcrübəsinə cəlb ediləcəklər. Proqramı uğurla başa vuran tələbələr əmək bazarında əvəzolunmaz kadrlar hesab olunacaq.