Bakı, 10 mart, AZƏRTAC
Əmlak Məsələləri Dövlət Komitəsinin təşəbbüsü ilə Daşınmaz Əmlakın Dövlət Reyestri Xidmətində “Daşınmaz əmlakla bağlı SMS xidmətləri: rahatlıq və çevikliyin təminatı” mövzusunda ictimai təqdimat keçirilib.
AZƏRTAC xəbər verir ki, tədbiri keçirməkdə məqsəd komitənin fəaliyyət sahələrində şəffaflığın səviyyəsini daha da yüksəltmək, xidmətlərdə rahatlığı, əlverişliliyi və operativliyi təmin etmək, eyni zamanda sosial məmnunluğu artırmaq üçün istifadəyə verilən SMS xidmətləri, bu xidmətlərin vətəndaş-məmur təmasının sıfıra endirilməsi və vaxt itkisinin qarşısının alınmasında rolu barədə ictimaiyyəti məlumatlandırmaqdır.
Bildirilib ki, komitənin fəaliyyətində mərkəz xətti informasiya texnologiyalarının, elektron xidmətlərin tətbiqini genişləndirmək, vətəndaşlara daha rahat və çevik xidmətlər təqdim etmək olub. Komitə istifadəyə verdiyi 31 elektron xidmətin 3-ünü SMS vasitəsi ilə də göstərir. Bu xidmətlərə daşınmaz əmlakın qeydiyyatı ilə bağlı müraciət üzrə xidmət haqqının, daşınmaz əmlakın qeydiyyatı ilə bağlı müraciətin icra vəziyyətinin və dövlət əmlakının icarəyə verilməsi müqavilələri üzrə icarə haqqı borcunun öyrənilməsi aiddir.
Tədbirdə yeni SMS xidmətləri ilə bağlı çıxışlar və təqdimatlar olub, bu xidmətlərin əhəmiyyəti, istifadə qaydaları izah olunub.