Zaqatala, 8 mart, AZƏRTAC
Zaqatala rayonunun taxılçılıq təsərrüfatlarında payızlıq taxıl əkinlərinə aqrotexniki qulluq işləri davam etdirilir.
Rayon İcra Hakimiyyətinin aqrar məsələlər şöbəsindən AZƏRTAC-a bildiriblər ki, hazırda taxıl əkini sahələrinə yemləmə-azot gübrəsinin verilməsinə başlanılıb. Bu məqsədlə “Aqrolizinq” ASC-nin rayon filialı tərəfindən təsərrüfatlara indiyədək güzəştli qiymətlərlə 493 ton azot gübrəsi satılıb.
Xatırladaq ki, ötən ilin payızında rayonun təsərrüfatlarında 2015-ci ilin məhsulu üçün 12 min 148 hektar sahəyə taxıl əkilib. Taxıl əkinlərinin 8 min 417 hektarını buğda, 3731 hektarını arpa sahələri təşkil edir.
Dövlətimizin başçısı tərəfindən fermerlərə və sahibkarlara göstərilən qayğının təzahürü olaraq, kənd təsərrüfatı məhsulları istehsalçılarına əkin sahələrinin becərilməsində istifadə etdikləri mineral gübrələrin satışı zamanı tətbiq olunan güzəştin 50 faizdən 70 faizədək artırılması Zaqatala rayonunda da məhsuldarlığın artırılması üçün geniş imkanlar açır.