Bakı, 8 mart, AZƏRTAC
Qubada fəaliyyət göstərən “Yurd” Gənclərin İntellektual İnkişafına Dəstək İctimai Birliyi tərəfindən “National Geographic Azerbaijan” jurnalının, rayonun gənclər və idman idarəsinin və təhsil şöbəsinin dəstəyi ilə təşkil olunan “Zəka oyunları” festivalının Hacıqayıb kəndində keçirilən seçim turu gərginliyi ilə yadda qalıb.
İctimai Birlikdən AZƏRTAC-a bildiriblər ki, seçim turunda iştirak edən Hacıqayıb, Qımılqışlaq, Küpçalqışlaq, Əliməmmədoba, Hacıhüseynli kənd məktəblilərinin səkkiz komandasının mübarizəsində Əliməmmədoba kəndinin “İntellekt” komandası finala vəsiqə qazanıb. Qımılqışlaq kəndinin eyni adlı komandasının oyunçuları ikinci olublar. Hacıhüseynlini təmsil edən “Şimşək” komandası isə üçüncü mükafata sahib olub.
Seçim turunun yekununda qalib və mükafatçılar təşkilatçılar tərəfindən diplomlarla təltif edilib.
Festivalın final mərhələsi mayın 16-da Quba şəhərində keçiriləcək.