Bakı, 7 mart, AZƏRTAC
Azərbaycan Respublikası Dövlət Neft Şirkətinin (SOCAR) Rumıniyadakı nümayəndəliyinin dəstəyi ilə Buxarest İqtisadiyyat Akademiyasında “Rəqabətədavamlı iqtisadiyyatda ekoloji səmərəlilik” mövzusunda 7-ci Beynəlxalq konfrans keçirilib.
Dövlət Neft Şirkətinin mətbuat xidmətindən AZƏRTAC-a verilən məlumata görə, konfransda SOCAR-ın fəaliyyəti, regionun enerji xəritəsini dəyişəcək TANAP, TAP, eləcə də “Cənub” qaz dəhlizi layihələri barədə iştirakçılara ətraflı məlumat verilib. Vurğulanıb ki, Azərbaycan Respublikası Dövlət Neft Şirkətinin həyata keçirdiyi layihələrdə ekoloji məsələlər hər zaman diqqətdə saxlanılır.
Tədbir çərçivəsində “Rumıniyanın kənd təsərrüfatı sahəsinin inkişafında Avropa fondlarının verdiyi kreditlərin təsiri”, “Avropa İttifaqında davamlı artım”, “Elektrik enerjisinin istehsalı üçün alternativ texnologiyalar ilə bağlı əsas iqtisadi və ekoloji aspektlər” və digər mövzular ətrafında çıxışlar olub.
Qeyd edək ki, konfransda Almaniya, İtaliya, Yunanıstan, Moldova və digər ölkələrin aparıcı universitetlərinin, beynəlxalq fond və təşkilatların nümayəndələri iştirak ediblər.