Bak, 6 mart, AZƏRTAC
Martın 6-da Dini Qurumlarla İş üzrə Dövlət Komitəsində Azərbaycan Respublikasının millətlərarası, multikulturalizm və dini məsələlər üzrə Dövlət müşaviri Kamal Abdullayevin iştirakı ilə ölkədəki mövcud dini vəziyyətə həsr olunmuş müşavirə keçirilib.
AZƏRTAC xəbər verir ki, komitənin sədri Mübariz Qurbanlı müşavirəni açaraq ölkəmizdə dini vəziyyət, icmaların qeydiyyat məsələləri, yeni icmaların yaradılması, dini maarifləndirmə sahəsində görülən işlər və müzakirə olunacaq məsələlər barədə ətraflı məlumat verib. Qeyd edilib ki, komitənin cari ildəki fəaliyyəti və dini vəziyyətin tənzimlənməsi baxımından müşavirə xüsusi əhəmiyyət kəsb edir.
Müşavirədə bölgə şöbə müdirləri dini vəziyyət, eləcə də görüləcək işlərlə bağlı məlumat verib, komitənin fəaliyyəti ilə bağlı digər məsələlər müzakirə edilib.
Müşavirənin sonunda Mübariz Qurbanlı bildirib ki, bu formatda tədbirlərin mütəmadi keçirilməsi ümumi işin səmərəliliyinə və daha yüksək nəticələr əldə olunmasına xidmət edəcək.