Hər il olduğu kimi bu il də Novruz bayramı tədbirləri dövlət səviyyəsində qeyd olunacaq. Xüsusilə Dənizkənarı bulvar idarəsi bu Novruza özünəməxsus hazırlaşıb. Belə ki Martın 19-da baş tutacaq bayram tədbiri Qız qalası önündən başlayacaq və bulvar ərazisinə qədər davam edəcək. Milli park ərazisində Azərbaycan mədəniyyət və incəsənətinə dair nümunələr sərgilənəcək. İştirakçılar müxtəlif musiqi nömrələri ilə çıxış edəcək, qurulan süfrələrdə milli mətbəximizin dadlı təamları yer alacaq. Bayram çərçivəsində hər bir regionun məşhur məhsulu nümayiş olunacaq, bununla yanaşı həmin məhsulların satışı da həyata keçiriləcək.

Dənizkənarı Bulvar idarəsinin rəis müavini Nazim Məcidovun sözlərinə görə builki Novruz bayramı tədbirləri fərqli keçiriləcək.

Bulvar ərazisindəki bayram ab havası martın 22-nə kimi davam edəcək. 3 yerdə Novruzun atributu olan böyük səməni quraşdırılacaq, onların ətrafını isə Novruzun simaları olan keçəl kosa və bahar qızı bəzəyəcək. Bu Novruz bayramında da paytaxtda atəşfaşanlıq olacaq. Bakı şəhər icra hakimiyyətinin mətbuat xidmətinin rəhbəri Nailə Məmmədova ilaxır çərşənbə günü və bayram günü Dənizkənarı Milli park ərazisində konsert və atəşfəşanlıq keçiriləcəyini bildirib.

Mənbə
ANS PRESS Xəbərçi Vəfa Təyyarqızı