Bakı, 5 mart, AZƏRTAC
“Sığortalı Gənclik” layihəsi çərçivəsində Bakı Slavyan Universitetində görüş keçirilib.
Azərbaycan Sığortaçılar Assosiasiyasından AZƏRTAC-a bildiriblər ki, görüşdə universitetin 70 tələbəsi iştirak edib. Azərbaycan Sığortaçılar Assosiasiyasının nümayəndələri tələbələrə layihənin məqsədi və sığorta ilə bağlı maariflənmənin əhəmiyyətindən danışıblar.
Tədbir iştirakçılarına, həmçinin, sığortanın tarixi, dünya sığorta bazarında gedən proseslər, Azərbaycanın sığorta sektorundakı mövcud vəziyyətlə bağlı geniş məlumat verilib, sığortanın mahiyyəti və onun faydaları barədə danışılıb. Görüşdə tələbələrin sığorta ilə bağlı sualları cavablandırılıb, onlarla fikir mübadiləsi aparılıb. İştirakçılar sığorta sahəsinə aid maraqlı fikirlər səsləndiriblər. Ümumilikdə, iştirakçılar təlimi maraqla qarşılayıb və faydalı məlumatlar əldə etdiklərini bildiriblər.
Xatırladaq ki, “Sığortalı gənclik” layihəsi Azərbaycan Respublikası Maliyyə Nazirliyinin, eləcə də Gənclər və İdman Nazirliyinin dəstəyi, Azərbaycan Sığortaçılar Assosiasiyasının, Azərbaycan Tələbə Gənclər Təşkilatları İttifaqı, Azərbaycan Respublikası Gənclər Təşkilatları Milli Şurası və “Vətəndaş cəmiyyətində debat” İctimai Birliyinin təşkilatçılığı və “Buta Sığorta”nın tərəfdaşlığı ilə həyata keçirilir.