Bakı, 3 mart, AZƏRTAC
Azərbaycan Texniki Universitetində (AzTU) Azərbaycan Sığortaçılar Assosiasiyası (ASA) və Azərbaycan Tələbə Gənclər Təşkilatları İttifaqının (ATGTİ) təşkilatçılığı, “Buta Sığorta”-nın tərəfdaşlığı ilə tələbələr üçün sığorta təlimi keçirilib.
ASA-dan AZƏRTAC-a bildiriblər ki, “Sığortalı gənclik” layihəsi çərçivəsində keçirilən tədbirdə Azərbaycan Sığortaçılar Assosiasiyasının nümayəndələri layihənin məqsədi və sığorta ilə bağlı maariflənmənin əhəmiyyətindən danışıblar.
Eyni zamanda, sığortanın tarixi, dünya sığorta bazarında gedən proseslər, Azərbaycanın sığorta sektorundakı mövcud vəziyyət barədə geniş məlumat verilib, tələbələrin sualları cavablandırılıb.
Xatırladaq ki, “Sığortalı gənclik” layihəsi Maliyyə, Gənclər və İdman nazirliklərinin dəstəyi ilə həyata keçirilir.
Təşkilatçılar ASA, ATGTİ, Azərbaycan Respublikası Gənclər Təşkilatları Milli Şurası və “Vətəndaş cəmiyyətində debat” İctimai Birliyidir.