Bakı, 3 mart, AZƏRTAC
Fevralın 27-də Moskvanın mərkəzində qətlə yetirilmiş Rusiyanın müxalifət liderlərindən biri olan Boris Nemtsovun nəşi bu gün Troekurovsk qəbiristanlığında torpağa tapşırılıb.
AZƏRTAC Rusiyanın NTV telekanalına istinadla xəbər verir ki, dəfn zamanı təhlükəsizlik tədbirləri gücləndirilib, qəbiristanlığın girişində xüsusi təyinatlı milislərin olduğu bir neçə avtomobil keşik çəkib.
Bir qədər əvvəl Boris Nemtsovun ailə üzvləri, qohumları, həmkarları və silahdaşları, həmçinin xarici ölkə diplomatları, o cümlədən ABŞ və Avropa İttifaqının Rusiyadakı səfirləri Con Teft və Viqaudas Uşatskas siyasətçi ilə vida mərasiminə qatılmışdılar.
Qeyd edək ki, Rusiya baş nazirinin keçmiş müavini, Nijeqorod vilayətinin keçmiş qubernatoru, Yaroslavl vilayət dumasının deputatı Boris Nemtsov fevralın 28-nə keçən gecə Moskvanın mərkəzində, Böyük Moskvoretsk körpüsündə qətlə yetirilmişdi.