Bakı, 22 aprel, AZƏRTAC
Tələbə Qəbulu üzrə Dövlət Komissiyasının (TQDK) daha bir informasiya ehtiyatı Dövlət İnformasiya Ehtiyatlarının Reyestrində qeydiyyata alınıb.
TQDK-dan AZƏRTAC-a bildiriblər ki, "Elektron hökumət” portalının operatoru tərəfindən "Mənim məktəbim" informasiya ehtiyatı Dövlət İnformasiya Ehtiyatlarının Reyestrində dövlət qeydiyyatına alınıb.
"Mənim məktəbim" informasiya ehtiyatının tərkibində 1995-ci ildən 2014-cü ilədək olan dövr üzrə respublikanın bütün məktəbləri məzunlarının göstəricilərinin dinamikası təhlil şəklində yerləşdirilib. Bu məlumatlar fənlər üzrə düzgün cavabların faizlərini, orta imtahan ballarının və ali məktəblərə qəbul olma göstəricilərinin dinamikasını tam şəkildə əhatə edir.
"Mənim məktəbim" informasiya ehtiyatı göstəricilərin dinamikası, qəbul proseslərinin nəticələri və ən qabaqcıl məzunlar kimi bölmələrdən ibarətdir. Qeyd edilən informasiya ehtiyatında təfərrüatı ilə bütün məktəblər üzrə qəbul imtahanlarında iştirak edən məzunların sayı, onlardan qız və oğlanların statistik göstəriciləri ayrı-ayrılıqda verilməklə, toplanılan orta ballar, ödənişli və ödənişsiz əsaslarla universitetə qəbul olanların sayı və s. kimi əhəmiyyətli statistik məlumatlar əksini tapıb.
“Mənim məktəbim" informasiya ehtiyatı beynəlxalq ekspertlər tərəfindən də yüksək qiymətləndirilir. Belə ki, “Mənim məktəbim" informasiya ehtiyatı Avstraliyada 2014-cü ildən istifadəyə verilmiş “My School” informasiya portalı ilə birlikdə Amerika Birləşmiş Ştatlarının Kolumbiya Universitetindən olan ekspertlər qrupu tərəfindən araşdırılmaqdadır. Araşdırmanın məqsədi bu kimi layihələrin təhsilin keyfiyyətinə təsiri, həmçinin təhsil xidmətinin ictimaiyyət tərəfindən qiymətləndirilməsi yollarının digər ölkələrdə də tədqiqinə nail olmaqdır.
Hazırda "Mənim məktəbim" informasiya ehtiyatı www.mekteb.edu.az saytında istifadəçilərə təqdim edilir.