Bakı, 22 aprel, AZƏRTAC
Azərbaycanın “Eurovision-2015” mahnı müsabiqəsindəki təmsilçisi Elnur Hüseynov Avropa promoturu çərçivəsində ötən gün Belçikada olub.
AZƏRTAC xəbər verir ki, təmsilçimiz səfərdən yaxşı formada yararlanıb. Belə ki, o, “Menttv” telekanalına, mediawatchers.be saytına müsahibə verib və videotəqdimat üçün çəkilişdə iştirak edib, “TV Limburg”in efirində “Hour of the Wolf” müsabiqə mahnısını səsləndirib. Bundan əlavə Elnur müsabiqə həmkarı olan Belçika nümayəndəsi Loik Notte ilə görüşüb.
Loik təəssüratlarını belə bölüşüb: “Hour of the Wolf” çox güclü kompozisiyadır və heç kim bu musiqiyə biganə qoya bilməz. Hesab edirəm ki, Elnurun çox güclü səsi var. Yeri gəlmişkən, mahnının klipi də xoşuma gəldi”.