Tokio, 22 aprel, AZƏRTAC 
Yaponiyanın Baş naziri Şinzo Abe Asiya və Afrika ölkələrinin sammitində iştirak etmək üçün aprelin 21-də Cakartaya yola düşüb.
Aprelin 22-də öz işinə başlayacaq ikigünlük sammit Bandunq konfransının 60 illiyinə həsr olunub. 1955-ci ildə keçirilən konfransda yeni müstəqillik əldə etmiş Asiya və Afrika ölkələri kolonializmə qarşı etirazlarını bildirmişdilər.
Səfərə yola düşməzədən əvvəl Ş.Abe jurnalistlərə deyib ki, imkan yaranacağı təqdirdə o, Çin Xalq Respublikasının sədri Si Cinpinlə görüşəcək. Baş nazir ümid etdiyini bildirib ki, hər iki ölkə münasibətlərin yaxşılaşdırılması üçün qarşılıqlı faydalı strateji tərəfdaşlıq əlaqələrinin bərpasına nail ola bilər.
Ş.Abenin aprelin 22-də sammitdə çıxışı planlaşdırılır. Çıxışında o, müharibə illərində Yaponiyanın hərəkətlərinə təəssüfləndiyini bildirmək və müharibədən sonrakı dövrdə beynəlxalq əməkdaşlığın inkişafı üçün atdığı addımlardan danışmaq niyyətindədir.
Vüqar Ağayev
AZƏRTAC-ın xüsusi müxbiri
Tokio