Bakı, 20 aprel, AZƏRTAC
Belarus “Azərbaycan Dəmir Yolları” Qapalı Səhmdar Cəmiyyətinə (QSC) Mogilyov zavodunda istehsal olunan vaqonları təklif edir. Təklif “Azərbaycan Dəmir Yolları” QSC-nin sədri Cavid Qurbanovun Belarusun Azərbaycandakı səfiri Nikolay Patskeviç və BELAZ holdinqinin direktoru Petr Parxomçiklə keçirdiyi görüşdə səslənib.
QSC-nin mətbuat katibliyinin rəisi Nadir Əzməmmədov AZƏRTAC-a bildirib ki, QSC-nin sədri Cavid Qurbanov qonaqlara Azərbaycan Dəmir Yolunda reallaşdırılan layihələr, qarşıda duran perspektiv vəzifələr haqqında ətraflı məlumat verib. Qeyd olunub ki, Azərbaycan dəmiryolçuları belaruslu həmkarları ilə əlaqələrin genişləndirilməsinə həmişə yüksək önəm verir.
Belarusun Azərbaycandakı səfiri Nikolay Patskeviç dəmir yolu nəqliyyatı və daşımalar sahəsində Belarus-Azərbaycan əməkdaşlığının hazırkı vəziyyəti və inkişaf perspektivləri haqqında danışıb.
BELAZ holdinqinin direktoru Petr Parxomçik BELAZ şirkətinin tərkibində fəaliyyət göstərən Mogilyov zavodunda istehsal olunan 9 növ dəmir yolu vaqonunu “Azərbaycan Dəmir Yolları” QSC-yə təklif edib.
İkitərəfli əməkdaşlığın bundan sonra daha da genişləndirilməsi ilə bağlı müzakirələrin davam etdirilməsi qərara alınıb.