Bakı, 20 aprel, AZƏRTAC
Azərbaycan, Türkmənistan və Gürcüstan TRASECA-nın inkişafı üzrə komitənin yaradılması məsələlərini müzakirə ediblər. Müzakirələr Aşqabad şəhərində Türkmənistanın Nazirlər Kabineti sədrinin nəqliyyat və rabitə məsələləri üzrə müavini Satlık Satlıkovla keçirilən görüşdə aparılıb.
“Azərbaycan Dəmir Yolları” Qapalı Səhmdar Cəmiyyətinin mətbuat katibliyinin rəisi Nadir Əzməmmədov AZƏRTAC-a bildirib ki, tərəflər Azərbaycan, Türkmənistan və Gürcüstan iştirakçı dövlətlərin limanlarından istifadə etməklə onlar arasında beynəlxalq nəqliyyat marşrutunun (TRACECA) inkişafı üzrə komitənin yaradılması məsələsini müzakirə ediblər.
Görüşdə Səhmdar Cəmiyyətinin sədri Cavid Qurbanovun rəhbərlik etdiyi nümayəndə heyəti ilə yanaşı “Gürcüstan Dəmir Yolları” SC-nin, “Azərbaycan Xəzər Dəniz Gəmiçiliyi” QSC-nin və Bakı Beynəlxalq Dəniz Ticarəti Limanının nümayəndələri də iştirak edib.
Eyni zamanda Avropa-Qafqaz-Asiya (TRACECA) beynəlxalq nəqliyyat dəhlizi üzrə Türkmənistan vasitəsilə idxal-ixrac yüklərinin tranzit daşımaları üçün əlverişli şəraitin yaradılması da müzakirə olunub.