Neftçala, 17 aprel, Mahir Babayev, AZƏRTAC
Aprelin 17-də Mədən Sənayesində Şəffaflığın Artırılması Koalisiyası üzrə Katiblik Dünya Bankının dəstəyi ilə Neftçaladakı 1 saylı tam orta məktəbdə “Mədən Hasilatı üzrə Şəffaflıq Təşəbbüsü (MHŞT) haqqında ictimai məlumatlılığın artırılmasına” həsr olunan “dəyirmi masa” keçirib.
AZƏRTAC xəbər verir ki, vətəndaş cəmiyyəti təşkilatları, dövlət qurumları, bələdiyyə, yerli icmalar və hasilat sənayesi nümayəndələrinin qatıldıqları “dəyirmi masa”da çıxış edən Neftçala rayon icra hakimiyyəti başçısının müavini Gültəkin Sadıqova tədbirin əhəmiyyətindən danışıb.
Qeyd edilib ki, MHŞT hesabatlılığın və yaxşı idarəetmənin artırılması naminə çalışan hökumətlər, şirkətlər və vətəndaş cəmiyyətinin koalisiyasıdır. MHŞT neft, qaz və mədən sənayesində şirkətlərin ödənişi və dövlətin gəlirlərinin tam nəşr olunması və dəyərləndirilməsi ilə resurslarla zəngin ölkələrdə yaxşı idarəetməyə töhfə verir. Azərbaycan bu quruma 2003-cü ildə qoşulub və 2009-cu ildən ilk tamhüquqlu üzv elan edilib. Hazırda koalisiyanın 110-dan çox QHT üzvü var və koalisiya ictimai məlumatlandırma sahəsində əsas tərəflərdən biridir.
Çıxışlarda Mədən Sənayesində Şəffaflığın Artırılması Koalisiyasının yaratdığı imkanlardan ətraflı bəhs olunub, “Mədən Hasilatı üzrə Şəffaflıq Təşəbbüsü: Nəyi bilməliyik, nəyə diqqətli olmalıyıq” mövzusunda təqdimat keçirilib.
Sonda iştirakçıları maraqlandıran suallar cavablandırılıb, müxtəlif buklet və kitabçalar paylanılıb.