Bakı, 15 aprel, AZƏRTAC
İnsan doğulandan dərhal sonra onun ürək hüceyrələrində regenerasiya prosesi dayanır. Lakin başqa toxumalarda (epiteli, saç), qan hüceyrələrində insanın həyatı boyu bərpa prosesi gedir.
AZƏRTAC xarici KİV-lərə istinadla xəbər verir ki, Avstraliya və İsrail alimləri laboratoriya siçanları üzərində apardıqları tədqiqatlar nəticəsində hətta infarktdan sonra ürək əzələsi hüceyrələrini bərpa etməyin mümkünlüyünü sübuta yetiriblər. Yeni metod infarktdan və onun ağırlaşmalarından ölüm hallarını dəfələrlə aşağı salmağa kömək göstərəcək. Kəskin işemik tutmadan sonra keçirilən bir sıra proseduralar ürək əzələsi və keçirici toxumalarını bərpa edəcək ki, bu da öz növbəsində kardioloji xəstələrin ömrünü uzadacaq.
Yeni texnologiyanın insanlar üzərində ilk sınağının 2020-ci ildə aparılması nəzərdə tutulur.