Bakı, 15 aprel, Nihat Budaqov, AZƏRTAC
Dünya bazarında neftin qiymətinin aşağı düşməsi Azərbaycan Respublikası Dövlət Neft Şirkətinin (SOCAR) gəlirlərinə təsiri var, ancaq biz bu təsiri o qədər də böyük həcmdə hiss etmirik.
AZƏRTAC xəbər verir ki, bu sözləri SOCAR-ın iqtisadi məsələlər üzrə vitse-prezidenti Süleyman Qasımov jurnalistlərə müsahibəsində deyib.
“Dövlət Neft Şirkəti xam neft ixrac etmir, şirkət əsasən daxili bazarda neftin emalını həyata keçirməklə bazarın tələbatını təmin etmək funksiyasını yerinə yetirir. Daxili bazarda da neft məhsullarının və təbii qazın qiyməti dövlət tərəfindən tənzimlənən qiymətlərdir. Bu qiymətlər SOCAR-ın qarşıya qoyduğu proqramların maliyyələşdirilməsi imkanlarına tam olmasa da cavab verə bilir. Buna baxmayaraq Dövlət Neft Şirkətinin gəlir-xərclər smetası müvafiq nazirliklər ilə razılaşdırılmaqla artıq təsdiq olunub. Gəlir-xərclər smetasında biz 2015-ci ildə qarşıya qoyduğumuz layihələrin maliyyələşdirilməsini nəzərdə tutmuşuq”, – deyə S.Qasımov qeyd edib.