Salyan, 15 aprel, Mahir Babayev, AZƏRTAC
Salyanlı torpaq mülkiyyətçiləri qarpız əkininə başlayıblar.
AZƏRTAC xəbər verir ki, qarpız əsasən rayonun Xələc, Marışlı, Noxudlu və Kürqaraqaşlı kəndlərinin ərazilərində əkilir. Bu ərazilərdə yetişdirilən məhsul yüksək keyfiyyətinə görə seçildiyindən hətta, qonşu rayonlardan da Salyana qarpız əkib-becərməyə gəlirlər. Məsələn, şamaxılı Hacıağa Etibarov ailəsi ilə birgə 15 ilə yaxındır ki, Salyanda bostançılıqla məşğuldur. Çətin və daha çox xərc aparmasına baxmayaraq, mayın sonuna kimi bazarlara qarpız çıxarmaq niyyətində olan ailə, indidən sahələrə qarpız toxumu əkirlər. Ailə üzvləri ilə birgə çalışan fermer, ötən il hər hektardan 50 tondan artıq qarpız yığıb. Bu il isə daha çox məhsul istehsal edəcəyini proqnozlaşdırır.
H.Etibarov deyir ki, çətinliklərimiz də az deyil. Xarici ölkələrdən gətirilən qarpız yerli məhsulun satışına mane olur. Tədricən yerli məhsulların yenidən üstünlük qazanacağını söyləyən təcrübəli bostançı bildirib ki, yerli qarpız sortlarının inkişaf etdirilməsi, daha geniş sahələrdə əkilməsi bu istiqamətdə vacib amildir.
Qeyd edək ki, bu mövsüm Salyanda min hektardan çox sahədə qarpız əkiləcək. Bu da ötənildəkindən təxminən 200 hektar artıqdır.