Berlin, 14 aprel, AZƏRTAC
Avropa Parlamentinin Slovakiyadan olan deputatı Eduard Kukan tərəfindən hazırlanmış işçi sənədin aprelin 13-də aparılmış müzakirəsi göstərdi ki, mövcud alətlərin natamamlığı kimi, dəyişikliklər aparılmasının zəruriliyi də hamı tərəfindən qəbul edilir.
Məruzəçi Avropa İttifaqı (Aİ) Parlamentinin xarici işlər komitəsinin iclasına öz sənədini təqdim edərək xatırladıb ki, qonşuluq siyasəti aləti 10 il əvvəl işə salınıb. “Aİ ilk strategiyasını 2003-cü ildə dərc edərkən, məqsədin Aİ-ni sabit ölkələr ilə əhatə etmək” olduğunu deyən Eduard Kukan, təəssüf ki, bunun həyata keçmədiyini qeyd edib.
Hollandiyadan olan deputat Kati Piri də öz növbəsində “gözlədikləri sabitlik əhatəsinin baş tutmadığını” vurğulayıb. Onun fikrincə, bunun təqsirinin çoxu Avropa tərəfindədir. “Biz Ukraynada “narıncı inqilab”dan sonra 2004-2005-ci illərdə nələrin baş verdiyini xatırlayırıq. Lakin bütün bunlar başa çatdıqdan və telekameralar quraşdırıldıqdan sonra diqqətimiz zəiflədi” – deyə xanım deputat əlavə edib. Kati Piri diqqəti bəzi Avropa siyasətçilərinin may ayında Riqada keçiriləcək sammiti yerdə qalanların “Şərq tərəfdaşlığı” sammiti adlandırmalarına yönəldərək, altı qonşu ölkədən hələ ki üçünün – Gürcüstan, Moldova və Ukraynanın Aİ ilə daha sıx əməkdaşlığa hazır olduğuna işarə edib.
Diskussiyalar zamanı alman deputat Mixail Qaler isə deyib: “Biz iki kateqoriyada - Avropada qonşuluq və Avropa ilə qonşuluq məsələləri çərçivəsində görüşürük. Bu zaman hər ölkəni layiq olduğu kimi nəzərdən keçirmək lazımdır”.
Siyasətçilər və ekspertlər hesab edirlər ki, üç ölkənin – Azərbaycan, Ermənistan və Belarusun Aİ ilə Assosiasiya Sazişi imzalamaqdan faktiki imtina etdiklərinə baxmayaraq, onlarla münasibətlər gələcəkdə də davam etdiriləcək.
Deputat Qaler deyib: “Bizə Şərq qonşularımızla əlaqələrimizdə çeviklik lazımdır. Biz heç kəsi istisna edə bilmərik”.
Vüqar Seyidov
AZƏRTAC-ın xüsusi müxbiri
Berlin