Bakı, 14 aprel, AZƏRTAC
Yəməndə Səudiyyə Ərəbistanının başçılığı ilə Fars körfəzi ölkələrinin hava zərbələri səbəbi ilə 120 mindən artıq insan evlərini tərk edib. Bu barədə aprelin 14-də BMT-nin humanitar məsələlərin koordinasiya idarəsi bildirib.
AZƏRTAC TASS informasiya agentliyinə istinadla xəbər verir ki, məcburi köçkünlərin əksər hissəsi - təxminən 60 min nəfəri Hacca əyalətində qeydə alınıb.
BMT-nin humanitar məsələlər idarəsinin məlumatına görə, son 24 saat ərzində Şabva, Əd-Dali, Ədən, Səda, Əmran, Marib, İbb və Əl-Cauf əyalətləri, həmçinin ölkənin paytaxtı Səna şəhərinin bəzi rayonları hava zərbələrinə məruz qalıb. Hücumlar zamanı həyatını itirənlərin olduğu bildirilsə də beynəlxalq təşkilatın onların sayı barədə məlumatı yoxdur.
Bir qədər əvvəl BMT “ərəb koalisiyasının” əməliyyatlarının başladığı gündən bu yana 300 nəfərdən artıq mülki şəxsin həlak olduğunu bildirmişdi.
Qeyd edək ki, martın 26-na keçən gecə Bəhreyn, Qətər, Küveyt və Birləşmiş Ərəb Əmirliklərinin dəstəyi ilə Səudiyyə Ərəbistanının Hərbi Hava Qüvvələri Yəmən ərazisində şiə üsyançılarının mövqelərinə hava zərbələri endirməyə başlayıb. Yəməndə qanuni prezident Abd Rabbo Mənsur Hadi və onun hökumətinin bərpa olunmasına yönələn “Qətiyyət tufanı” adı altında aparılan əməliyyatlara sonradan Misir, İordaniya, Mərakeş, Pakistan və Sudan da qoşulub.
Hazırda Yəmənin 22 əyalətindən 18-i bombardmanlara məruz qalır. BMT ölkədə kəskin ərzaq çatışmamazlığı barədə xəbərdarlıq edib. Belə ki, Ədən şəhərində unun tükənməsi səbəbi ilə bütün çörək bişirən zavodlar bağlanıb. Stasionar telefon əlaqəsi və mobil şəbəkə fəaliyyət göstərmir. Həmçinin Ədən, Abyan və Əd-Dali şəhərinin bəzi rayonlarında elektrik enerjisində böyük fasilələr yaranıb.