Bakı, 13 aprel, AZƏRTAC
Köln-Milan səfərini reallaşdırmaq üçün havaya qalxmağa hazırlaşan “Germanwings” aviaşirkətinin təyyarəsinə bomba qoyulması xəbəri səbəbindən uçuş təxirə salınıb.
AZƏRTAC xarici KİV-lərə istinadla xəbər verir ki, bu barədə aviaşirkət məlumat yayıb. Bildirilib ki, təyyarənin 126 sərnişini olub. Lakin bomba xəbəri səbəbindən uçuşu təxirə salınan təyyarəni digəri əvəzləyəcək. “Airbus A320” tipli təyyarədə bomba axtarışı davam etdirilir.
“Germanwings” şirkətinə aid Köln-Venesiya səfərini həyata keçirən digər bir sərnişin təyyarəsi isə yağ təzyiqində azalma meydana gəlməsi səbəbi ilə aprelin 6-da Ştuttqart hava limanına məcburi eniş etmişdi.
Xatırladaq ki, martın 24-də “Germanwings”e aid “Airbus A320” tipli sərnişin təyyarəsi Barselona-Düsseldorf səfərini reallaşdırarkən köməkçi pilot tərəfindən Fransanın cənubunda planlı şəkildə qəzaya uğradılmışdı. Təyyarədəki 6 heyət üzvü və 144 sərnişinin hamısı həlak olmuşdu.