Bakı, 11 aprel, AZƏRTAC
Ümummilli lider Heydər Əliyevin anadan olmasının 92-ci ildönümü münasibətilə “Heydər Əliyev məktəblilərin gözü ilə” mövzusunda inşa yazı müsabiqəsi keçirilib.
AZƏRTAC xəbər verir ki, artıq doqquzuncu dəfə təşkil olunan yazı müsabiqəsi respublikanın bütün ümumtəhsil məktəblərini əhatə edir. Bilik yarışında 8-11-ci sinif şagirdləri, o cümlədən ilk peşə ixtisası və orta-ixtisas təhsili müəssisələrinin şagirdləri iştirak ediblər.
Bilik yarışının rayon mərhələsi martda yekunlaşıb. Bu mərhələdə 15 mindən çox şagird iştirak edib. 109 nəfərin iştirak etdiyi respublika mərhələsində şagirdlər arasında qaliblər müəyyənləşdiriləcək. Bu mərhələni uğurla başa vuran məktəblilər birinci, ikinci və üçüncü yerlər uğurunda mübarizə aparacaqlar. Yarışda qalib gələn şagirdlərin inşa yazıları kitab şəklində çap olunacaq.