Bakı, 10 aprel, AZƏRTAC
Kənd Təsərrüfatı Nazirliyi tərəfindən aprel ayı ərzində respublika ərazisində aparılan yoxlama zamanı 9 satış məntəqəsinin lisenziyasız fəaliyyəti aşkar edilib.
Nazirliyin mətbuat xidmətindən AZƏRTAC-a bildiriblər ki, həmin satış məntəqələrində qeydiyyatdan keçməmiş, istifadə müddəti bitmiş müxtəlif adda (Lardeta, Ortiva Top, Rubit, Endosul Fan, Ola Of 85 və.s ) 25,5 kq pestisid dövriyyədən çıxarılıb, həmin məntəqələrin fəaliyyətləri dayandırılıb və qanunamüvafiq inzibatı tədbirlər görülüb.
Eyni zamanda, yoxlama nəticəsində Salyan rayonu ərazisində lisenziyasız fəaliyyət göstərən Abdullayev İlqar Ağahəsən oğluna məxsus pərakəndə satış obyektində respublika ərazisində ammonium nitrat gübrəsinin dəyəri 6,50 manat olduğu halda 9 manata satıldığı aşkar edilib və satış məntəqəsinin fəaliyyəti dayandırılıb. Məlumat üçün bildiririk ki, həmin satış məntəqəsində 26 ton ammonium nitrat mövcud olub.