Bakı, 10 aprel, AZƏRTAC
Çinin Şanxay şəhərində Formula-1 yarışının üçüncü mərhələsi keçirilir. Yarış zamanı tamaşaçılardan biri “Ferrari” komandasının qarajına daxil olaraq yarış maşınını qaçırmaq istəyib.
AZƏRTAC BBC-ə istinadən xəbər verir ki, bu zaman tamaşaçının həyatı ciddi təhlükə qarşısında qalıb. Belə ki, o, qaraja tərəf qaçarkən trasda yüksək sürətlə hərəkət edən iki boliddən canını güclə qurtarıb. Mühafizə xidmətinin əməkdaşları tamaşaçını dərhal saxlayaraq polisə təslim ediblər. Saxlanan “qəhrəman” ifadəsində Formula-1 bolidinə oturub maşını idarə etmək niyyətində olduğunu bildirib.
Qeyd edək ki, yarışda “Mercedes” komandasının üzvü britaniyalı Luiz Hemilton qalib gəlib.