Ermənistanın "Aykakan jamanak" qəzetində ölkə iqtisadiyyatında yaranan böhranlı vəziyyətlə bağlı növbəti məqalə dərc edilib.

ANS PRESS-in məlumatına görə, məqalədə deyilir ki, ölkədə son vəziyyət dözülməzdir, daxili və xarici sərmayə qoyuluşu üzrə faciəvi mənzərə yaranıb.

"Aykakan jamanak" qəzeti yazır ki, bu ilin birinci rübündə Ermənistan iqtisadiyyatına xarici investisiya qoyuluşunun həcmi olduqca aşağı səviyyədədir: "Düzdür, ilk rüb ərzində Ermənistanda xarici investisiya haqqında rəsmi məlumatlar yekunlaşdırılacaq və yalnız may ayında elan ediləcək. Ancaq, ilkin məlumatlara görə, vəziyyət faciəli şəkil halındadır."

Statistika göstərir ki, energetika, mədənçıxarma sənayesi və kənd təsərrüfatı sahələrinə cüzi investisiya qoyulub. Pərakəndə ticarət sektorunda da əhəmiyyətsiz həcm müşahidə olunub. İnvestisiyanın ümumi həcmi 10 milyon dollar daxilindədir. Halbuki son illərdə analoji dövr üçün göstərici 120-150 milyon dollar təşkil edib.
Mənbə
ANS PRESS