Bakı, 10 aprel, AZƏRTAC
Mayın 18-23-də 60-cı “Avroviziya” mahnı yarışmasının keçiriləcəyi Avstriyanın paytaxtı Vyana şəhərinin ictimai nəqliyyatında gediş-gəliş festivalın bütün iştirakçıları və qonaqları üçün pulsuz olacaq.
AZƏRTAC RİA Novosti informasiya agentliyinə istinadla xəbər verir ki, bu barədə jurnalistlərə “Avroviziya” müsabiqəsinin təşkilati məsələləri ilə məşğul olan Avstriyanın ORF telekompaniyasının ictimaiyyətlə əlaqələr üzrə direktoru Martin Biderman bildirib. “Biz ilk dəfə olaraq “Avroviziya”nı green event - ekoloji tədbir etməyi qərara almışıq. Bu, həmçinin qonaqların otellərdə yerləşdirilməsinə, qidalanmasına və ictimai nəqliyyata da aiddir”, - deyə Biderman əlavə edib.
Qeyd edək ki, Avstriyanın Vyana şəhərində təşkil olunacaq müsabiqənin mayın 19-da keçiriləcək ilk yarımfinalında Moldova, Ermənistan, Belçika, Niderland, Finlandiya, Yunanıstan, Estoniya, Makedoniya, Serbiya, Macarıstan, Belarus, Rusiya, Danimarka, Albaniya, Rumıniya və Gürcüstan, mayın 21-də keçiriləcək ikinci yarımfinalda isə Litva, İrlandiya, San Marino, Monteneqro, Malta, Norveç, Portuqaliya, Çex Respublikası, İsrail, Latviya, Azərbaycan, İslandiya, İsveç, İsveçrə, Kipr, Sloveniya və Polşa çıxış edəcək. Müsabiqənin finalı isə mayın 23-də olacaq.
“Avroviziya” müsabiqəsində Azərbaycanı “Hour Of The Wolf” mahnısı ilə Elnur Hüseynov təmsil edəcək.