Bakı, 9 aprel, AZƏRTAC 
İqtisadiyyat və sənaye naziri Şahin Mustafayev Macarıstanın Azərbaycandakı fövqəladə və səlahiyyətli səfiri Jolt Çutoranla görüşüb.
Nazirlikdən AZƏRTAC-a bildirilib ki, görüşdə ölkələrimiz arasında müxtəlif sahələrdə əməkdaşlığın uğurla inkişaf etdiyi, əlaqələrimizin genişləndirilməsində qarşılıqlı səfərlərin əhəmiyyəti vurğulanıb, Azərbaycan Respublikası Hökuməti və Macarıstan Hökuməti arasında iqtisadi əməkdaşlıq üzrə birgə komissiyanin fəaliyyəti qeyd edilib. Bildirilib ki, aprelin sonunda Macarıstanda birgə komissiyanin növbəti iclasının keçirilməsi nəzərdə tutulur.
Görüşdə birgə komissiyanin növbəti iclasına hazırlıq məsələləri müzakirə edilib, Azərbaycan və Macarıstan arasında iqtisadi əlaqələrin genişləndirilməsi, iqtisadiyyatın müxtəlif sahələrində, o cümlədən hava nəqliyyatı, tikinti, əczaçılıq, ekologiya və s. sahələrdə əməkdaşlığın inkişafı və qarşılıqlı maraq doğuran digər məsələlərə dair fikir mübadiləsi aparılıb.