Bakı, 9 aprel, AZƏRTAC
Ailə, Qadın və Uşaq Problemləri üzrə Dövlət Komitəsinin sədri Hicran Hüseynova ölkəmizdə səfərdə olan İran İslam Respublikasının Azad İslam Universitetinin rektoru, mədəniyyət və islam irşadi nazirinin müşaviri Pərvin Dadəndiş ilə görüşüb.
AZƏRTAC xəbər verir ki, görüşdə Azərbaycan və İran arasında ailə, qadın və uşaq problemlərinin həlli sahəsində əməkdaşlığın perspektivləri müzakirə olunub.
İki ölkə arasında münasibətlərin yüksək səviyyədə olduğunu deyən Hicran Hüseynova iranlı qonağa rəhbərlik etdiyi qurumun həyata keçirdiyi layihələr barədə məlumat verib. Ölkəmizdə məqsədyönlü gender siyasətinin aparıldığını vurğulayan H.Hüseynova Azərbaycanın birinci xanımı, Heydər Əliyev Fondunun prezidenti Mehriban Əliyevanın qadın və uşaq hüquqlarının müdafiəsi istiqamətindəki fəaliyyətini diqqətə çatdırıb. Bildirilib ki, Azərbaycanda ailə, qadın, uşaq problemlərinin həlli dövlət siyasətinin prioritet istiqamətlərdən biridir.
AQUPDK-nın sədri müvafiq istiqamətlər üzrə xarici ölkələr, o cümlədən İran ilə əməkdaşlığın inkişafının əhəmiyyətini qeyd edib.
İran və Azərbaycan xalqlarının tarixi, mədəni və dini köklərlə bir-birinə bağlı olduğunu söyləyən qonaq ölkələrimiz arasında ailə və qadın məsələləri üzrə əlaqələrin genişləndirilməsi üçün böyük potensialın olduğunu vurğulayıb. Azərbaycanda həyata keçirilən dövlət qadın siyasətini yüksək qiymətləndirən P.Dadəndiş İran ilə bu sahədə mövcud əməkdaşlığın inkişaf etdirilməsinin hər iki tərəf üçün faydalı olacağını bildirib.