Bakı, 9 aprel, AZƏRTAC
İqtisadiyyat və Sənaye Nazirliyinin Sahibkarlığa Kömək Milli Fondu Qazax rayonunun Ağköynək kəndində sahibkarlığın güzəştli kreditləşdirilməsi məsələlərinə dair işgüzar forum keçirib.
Nazirlikdən AZƏRTAC-a bildiriblər ki, əsas məqsəd sahibkarlara güzəştli kreditlərin alınması mexanizmi barədə ətraflı məlumatların verilməsi, Qazaxda həyata keçirilməsi məqsədəuyğun olan nümunəvi layihələrin təqdimatı, sahibkar-müvəkkil kredit təşkilatı münasibətlərinin möhkəmləndirilməsi, sahibkarların investisiya layihələrinin maliyyələşdirilməsidir.
Forumda Qazax rayonunun iqtisadi potensialının reallaşdırılması məqsədi ilə prioritet hesab olunan ixtisaslaşdırılmış “yaşıl market”, cins heyvandarlıq, üzümçülük və arıçılıq təsərrüfatlarının, ət kəsimi, pendir istehsalı, meyvəqurutma və günəbaxan tumlarının emalı və qablaşdırılması müəssisələrinin yaradılması üzrə nümunəvi investisiya layihələrinin təqdimatı olub.
Sahibkarlığa Kömək Milli Fondunun icraçı direktoru Şirzad Abdullayev bildirib ki, 2015-ci ilin ötən dövründə 1410 sahibkara 43,4 milyon manat güzəştli kredit verilib. Bu kreditlərdən istifadə etməklə investisiya layihələrinin reallaşdırılması 3200-ə yaxın yeni iş yerinin yaradılmasına imkan verir. Qeyd edilib ki, indiyədək Gəncə-Qazax iqtisadi rayonunda fəaliyyət göstərən sahibkarlıq subyektlərinin 5145 investisiya layihəsinin maliyyələşdirilməsinə 186,1 milyon manat güzəştli kredit verilib. Müasir texnologiyaların tətbiqinə əsaslanan logistik mərkəzlərin, taxıl anbarlarının, istixana təsərrüfatlarının, quşçuluq fabrikinin, cins iri buynuzlu heyvandarlıq komplekslərinin, çörək zavodlarının, meyvə-tərəvəz, ət, süd emalı, süfrə suları istehsalı, tikinti materiallarının istehsalı müəssisələrinin yaradılması və digər sahələr üzrə investisiya layihələri maliyyələşdirilib.
İşgüzar forum çərçivəsində Qazax və ətraf rayonlardan olan 60 sahibkara 3,2 milyon manat güzəştli kredit verilib. Kreditlər əsasən, heyvandarlıq, əkinçilik, üzümçülük, çörək istehsalı, istixana kompleksinin yaradılması sahələrinin inkişafına yönəldiləcək. Bu kreditlərin reallaşdırılması hesabına 120-ə yaxın yeni iş yerinin açılması mümkün olacaq.
Forum çərçivəsində Qazaxda güzəştli kredit ayrılmış meyvə-tərəvəz emalı zavoduna və 80 hektar sahədə kartof əkininə baxış keçirilib. İldə 39,5 min ton konserv məhsulları istehsal etmək gücündə olan emal zavodu Gürcüstanda yaşayan soydaşlarımızdan da kənd təsərrüfatı məhsullarını tədarük edəcək.