Paris, 9 aprel, AZƏRTAC
Fransanın dünyanın əksər ölkələrində yayımlanan TV5 Monde televiziya kanalı aprelin 8-də gecə saatlarında kiberhücuma məruz qalıb. İŞİD terror qruplaşması ilə əlaqəsi olan hakerlər kanala kiberhücum həyata keçirərək onun saytını dağıdıblar. Nəticədə kanalın televizorlarda görüntüləri itib. Hakerlər kanalın facebook hesabını da ələ keçiribilər.
Fransanın daxili işlər naziri Bernar Kazenöv, mədəniyyət naziri Flör Pellerən və xarici işlər naziri Loran Fabius aprelin 9-da kanalın Parisdə yerləşən əsas ofisinə baş çəkiblər.
Kanalın baş direktoru İv Biqo İŞİD terror qruplaşmasının əvvəllər kanalı dəfələrlə hədələdiyini söyləyib.
Daxili işlər naziri bu hadisəni pisləyərək bunun söz və fikir azadlığına qarşı yönəldiyini söyləyib.
Xatırladaq ki, bu kanal dünyanın 200-dən artıq ölkəsinin ərazisində yayımlanır.

Əsgər Əliyev
AZƏRTAC-ın xüsusi müxbiri
Paris