Bakı, 9 aprel, AZƏRTAC
İŞİD qruplaşması İraqda səkkiz ay bundan qabaq əsir götürdüyü 200-dən artıq yəzdi kürdünü azad edib. İraq Kürdüstanı silahlı birləşməsinin komandirinin sözlərinə görə, azad olunan insanların əksəriyyətinin vəziyyəti ağırdır.
AZƏRTAC Euronews telekanalına istinadla xəbər verir ki, yaraqlılar yəzdi kürdlərini Kərkük şəhəri yaxınlığında azad ediblər. Bir qədər əvvəl, yanvar ayında qruplaşma bu millətin daha 200 nümayəndəsini sərbəst buraxmışdı.
Bu arada məlum olub ki, İraq Kürdüstanı hökuməti yəzdilərin “Şanqalın müdafiə gücləri” adlı özünümüdafiə dəstəsinin komandiri Heydər Şeşonu həbsdə saxlayıblar. Onun peşmərgə güclərinə qatılmaq və yezdi bayrağından imtina etmək barədə Məsud Barzaninin ultimatumuna rədd cavabı verdiyi bildirilir. Barzaninin fikrinə görə, region kürd ərazisi olduğundan Şanqalı peşmərgələrdən başqa heç kim təmsil edə bilməz.
Qeyd edək ki, Heydər Şeşo aprelin 5-də “qeyri qanuni silahlı qruplaşma” yaratmaqda ittiham edilərək həbs olunmuşdu. Halbuki, “Şanqalın müdafiə gücləri” də kürd peşmərgələri kimi rəsmən İraq ordusunun bir hissəsi kimi tanınır, Şanqal isə Kürdüstanın deyil, İraqın bir parçasıdır.