Bakı, 8 aprel, AZƏRTAC
Azərbaycanda səfərdə olan Avropa Şurası Nazirlər Komitəsinin demokratiya üzrə məruzəçiləri aprelin 8-də ədliyyə nazirinin müavini Toğrul Musayevlə görüşüblər.
Ədliyyə Nazirliyinin mətbuat xidmətindən AZƏRTAC-a bildiriblər ki, Avropa Şurası və onun struktur qurumları ilə səmərəli əməkdaşlığı qeyd edən nazir müavini Azərbaycan Prezidenti İlham Əliyevin rəhbərliyi ilə məhkəmə sisteminin müasirləşdirilməsi, hakimlərin Avropada örnək kimi dəyərləndirilən seçimi, habelə vətəndaş cəmiyyətinin inkişafı, QHT-lərin fəaliyyətini tənzimləyən qanunvericiliyin təkmilləşdirilməsi, onlara dövlət dəstəyinin artırılması üzrə görülən işlər barədə məlumat verib. T.Musayev Avropa Şurasının Azərbaycan üçün 2014-2016-cı illər üzrə Fəaliyyət Planının icrası çərçivəsində nazirlik tərəfindən qarşılıqlı fəaliyyətin uğurla davam etdirildiyini vurğulayıb.
Azərbaycanla sıx əməkdaşlıq münasibətlərinin olduğunu deyən siyasi məsələlər üzrə direktor Aleksandr Qessel təmsil etdiyi qurumun üzv dövlətlərin Avropa Şurası qarşısında götürdüyü öhdəliklərinin icrası ilə bağlı fəaliyyətindən danışaraq ölkəmizdə gedən geniş demokratik prosesləri diqqətlə izlədiklərini bildirib. Məruzəçilər respublikamızda aparılan hüquqi islahatları təqdir edərək bu sahədə Ədliyyə Nazirliyinin rolunu qeyd ediblər.
Görüşdə, həmçinin məhkəmə hakimiyyətinin müstəqilliyi, vəkilliyin inkişafı və maraq doğuran digər məsələlər ətrafında faydalı fikir mübadiləsi aparılıb.
Avropa Şurasının Bakı Ofisinin rəhbəri Draqana Filipoviç və ölkəmizin Avropa Şurası yanındakı daimi nümayəndəsi Emin Eyyubov görüşdə iştirak ediblər.