Tokio, 8 aprel, AZƏRTAC
Yaponiyanın xarici işlər naziri Fumio Kişida deyib ki, atom bombardmanına məruz qalmış şəhərlərin dünya liderləri tərəfindən ziyarət olunması nüvə silahının yayılmaması və ləğvi prosesinə ciddi təkan verə bilər.
Bu barədə F.Kişida aprelin 27-də Nyu-Yorkda təşkil olunacaq Nüvə silahının yayılmaması müqaviləsinin icrası ilə bağlı icmal konfrans ərəfəsində kütləvi informasiya vasitələrinə müsahibəsi zamanı məlumat verib.
F.Kişida qeyd edib ki, Hiroşimada doğulmuş və böyümüş bir nazir olaraq, o, atom bombardmanına məruz qalmış şəhərlərin əhalisinin hisslərini nəzərə alır və nüvə silahının yayılmaması və ləğvi istiqamətində işləməyə çalışır.
Nazir vurğulayıb ki, dünya liderlərinin, xüsusən nüvə silahına malik ölkələrin rəhbərlərinin Hiroşima və Naqasaki şəhərlərini ziyarət etməsi nüvə silahının yayılmaması və ləğvi istiqamətində prosesə təkan vermək baxımından xüsusi əhəmiyyətə malikdir.

Vüqar Ağayev
AZƏRTAC-ın xüsusi müxbiri
Tokio