Füzuli, 4 aprel, AZƏRTAC
Əhalinin problemlərinin yerində öyrənilməsi və həlli məqsədilə Füzuli rayon rəhbərliyi tərəfindən mütəmadi olaraq yerlərdə sakinlərlə görüşlər keçirilir, onların fikir və təklifləri dinlənilir.
AZƏRTAC xəbər verir ki, rayonun hüquq-mühafizə, səhiyyə, təhsil, mədəniyyət, digər xidmət sahələri rəhbərləri, ərazi icra nümayəndələrinin də iştirakı ilə növbəti görüş cəbhə xəttində yerləşən Qazaxlar, Mirzənağılı və Əhmədalılar kəndlərində keçirilib.
Görüşdə əhalinin problemlərinin həlli, sosial rifahın yaxşılaşdırılması istiqamətində həyata keçirilən tədbirlərdən, Füzuli rayonunun işğaldan azad edilmiş ərazilərində aparılan quruculuq və abadlıq işlərindən danışılıb. Bildirilib ki, rayonun cəbhə xəttində yerləşən kəndlərinin problemlərinin həllinə diqqətlə yanaşılır. Digər kəndlərdə olduğu kimi, Qazaxlar, Mirzənağılı və Əhmədalılar kəndlərinin də elektrik enerjisi, su, qaz və yol ilə bağlı qayğıları tam həll olunub, sakinlər məcburi köçkünlər üçün nəzərdə tutulan bütün imtiyazlardan istifadə edirlər.
Sonra rayon elektrik şəbəkəsi, suvarma sistemləri idarəsi, qaz istismar sahəsi, su-kanal idarəsi və digər xidmət təşkilatlarının rəhbərləri kənd sakinləri qarşısında hesabat veriblər.
Sakinlərin müraciətləri, arzu və təklifləri dinlənilib. Qaldırılan məsələlərin bir çoxu yerindəcə həll edilib, bəzilərinin həlli üçün aidiyyəti qurumların rəhbərlərinə tapşırıqlar verilib.
Kənd sakinləri əhalinin problemlərinin həlli istiqamətində həyata keçirilən tədbirlərdən, rayonda aparılan abadlıq quruculuq işlərindən razılıqlarını ifadə edərək, dövlətimizin başçısına minnətdarlıqlarını bildiriblər.