Aprelin 4-də Bakıda “Akademi Group” Xaricdə Təhsil Mərkəzinin təşkilatçılığı ilə Türkiyə universitetlərinin təhsil sərgisi açılıb.
AZƏRTAC xəbər verir ki, Bakıdakı “Hilton Baku” otelində təşkil olunan sərgidə Türkiyənin 30-dək universiteti iştirak edir. Sərgidə tələbələrə xaricdə yüksək keyfiyyətli təhsil imkanı, yataqxanalar və digər məsələlər barədə ətraflı məlumat verilib. Həmçinin bu universitetlərdə pulsuz təhsil imkanları barədə təqdimat və seminarlar keçirilib.
Türkiyənin Azərbaycandakı səfirliyinin təhsil müşaviri Abdulqafur Büyükfırat sərginin iki qardaş ölkənin təhsil sahəsindəki əlaqələrinin inkişafına və azərbaycanlı gənclərin Türkiyədə təhsil almalarna böyük töhfə verəcəyini bildirib. Təhsil müşaviri hazırda Azərbaycanda 3.500-dək türkiyəli gəncin, qardaş ölkədə isə on minədək azərbaycanlı tələbənin təhsil aldığını söyləyib.
“Akademi Group”un Türkiyə layihələri üzrə rəhbəri Razi Vəliyev sərgidə Türkiyənin dünya reytinqində yer alan nüfuzlu dövlət və özəl universitetlərinin iştirak etdiyini söyləyib. Bildirilib ki, sərgi işini aprelin 7-də Avropanın Gənclər Paytaxtı elan olunan Gəncə şəhərində davam etdirəcək.
Gəncədəki “Vego” otelində keçiriləcək sərgidə digər xarici ölkə universitetləri də iştirak edəcək. R.Vəliyev 2016-cı ildə sərginin daha geniş təşkil olunacağını bildirib.
Sərgi aprelin 5-dək davam edəcək.