Bakı, 3 aprel, AZƏRTAC
Azərbaycan Respublikası Dini Qurumlarla İş üzrə Dövlət Komitəsi (DQİDK) ilə Bakı Şəhər Gənclər və İdman Baş İdarəsinin (BŞGİBİ) birgə hazırladığı tədbirlər planına əsasən “Milli mənəvi dəyərlərimiz: varislik və müasirlik” mövzusunda toplantı keçirilib.
BŞGİBİ-dən AZƏRTAC-a bildiriblər ki, toplantıda DQİDK-nın sədri Mübariz Qurbanlı, Gənclər və İdman Nazirliyinin gənclərlə iş şöbəsinin müdiri İndira Hacıyeva, BŞGİBİ-nin rəisi Raqif Abbasov rayon gənclər və idman baş idarələrinin rəisləri, gənclər təşkilatlarının, müxtəlif xalqların və dini icmaların nümayəndələri iştirak ediblər.
R.Abbasov çıxış edərək ölkəmizdə milli mənəvi dəyərlərin qorunması və inkişafı istiqamətində görülən işlərin əhəmiyyətindən danışıb, belə tədbirlərin mütəmadi olaraq keçirilməsinin vacibliyini vurğulayıb.
M.Qurbanlı isə çıxışında ölkəmizdə dövlət-din münasibətlərindən danışaraq bildirib ki, Azərbaycan müstəqilliyini bərpa etdikdən sonra xalqımızın milli mənəvi dəyərlərinə qayıdışı sürətlənib. O, ümummilli lider Heydər Əliyevin bu istiqamətdə mühüm xidmətlərini qeyd edib və hazırda Prezident İlham Əliyevin milli mənəvi dəyərlərimizin qorunması və təbliği ilə bağlı həyata keçirdiyi işlərdən danışıb. M.Qurbanlı dini maarifləndirmə işinin aparılmasının zəruriliyindən, bəzi radikal qrupların gəncləri öz təsir dairəsinə salmağa çalışmasından danışaraq, bunun qarşısının alınması üçün görülən işlərin bundan sonra da uğurla davam etdiriləcəyini vurğulayıb. Komitə sədri qeyd edib ki, Azərbaycanda dini radikalizmə qarşı mübarizə qanun çərçivəsində aparılır və bu mübarizədə ən səmərəli vasitə maarifləndirmə işidir.
Toplantının sonunda gəncləri maraqlandıran suallar cavablandırılıb.