Bakı, 3 aprel, AZƏRTAC
Bakı Biznes Tədris Mərkəzinin Gəncə nümayəndəliyinin və “Sahibkar qadınlar” İctimai Birliyinin təşkilatçılığı ilə Gəncədə gənclər üçün “Biznes ideyanı yarat”, “Öz biznesinə başla” və “İqtisadiyyat və Sənaye Nazirliyi tərəfindən göstərilən elektron xidmətlər” mövzularında treninq keçirilib.
İqtisadiyyat və Sənaye Nazirliyindən AZƏRTAC-a bildiriblər ki, tədbirdə biznes-ideyanın yaradılması, biznes-planların tərtib edilməsi, SWOT təhlilin aparılması və bu sahədə beynəlxalq təcrübə, maliyyə planlarının hazırlanması, innovativ texnologiyaların tətbiqi, yeni məhsul istehsalının və xidmətlərin göstərilməsinin təşkili, peşə hazırlığı səviyyəsinin yüksəldilməsi barədə iştirakçılara ətraflı məlumat verilib.
Digər treninq isə Bakı Biznes Tədris Mərkəzinin Qazax nümayəndəliyinin təşkilatçılığı ilə sahibkarlar və sahibkarlıq fəaliyyətinə yeni başlayanlar üçün təşkil olunub. Treninq “Kənd təsərrüfatında logistik menecment” və “İqtisadiyyat və Sənaye Nazirliyi tərəfindən göstərilən elektron xidmətlər” mövzularını əhatə edib.
Tədbirdə iştirakçılar logistik sistemlər, logistik idarəetmə, logistik mərkəzlərin yaradılması, əmtəə hərəkətinin və logistik infrastrukturun və logistik xərclərin idarə edilməsi haqqında məlumatlandırılıblar.
Treninqlərdə İqtisadiyyat və Sənaye Nazirliyi tərəfindən göstərilən elektron xidmətlər, www.icazeler.gov.az, www.b2b.az elektron portalları, portalların biznesin səmərəli təşkili və inkişafı üçün yaratdığı imkanlar, həmçinin investisiya layihələrinin maliyyələşdirilməsi ilə əlaqədar elektron idarəetmə sistemi barədə də məlumat verilib.