Bakı, 2 aprel, AZƏRTAC
Aprelin 2-də Nərimanov Rayon İcra Hakimiyyəti, Fövqəladə Hallar Nazirliyinin Bakı Regional Mərkəzi və Bakı Avropa Oyunları Əməliyyat Komitəsi Təhlükəsizlik Departamentinin birgə təşkilatçılığı ilə “Birinci Avropa Oyunlarının hazırlığı və keçirilməsi dövründə qarşıda duran ümumi vəzifələr” mövzusunda rayon müşavirəsi keçirilib.
Nərimanov Rayon İcra Hakimiyyəti başçısının birinci müavini, rayon fövqəladə hallar komissiyasının sədri Şahmar İbadov birinci Avropa Oyunlarının hazırlığı və keçirilməsi dövründə Fövqəladə Hallar Nazirliyinin Bakı Regional Mərkəzi ilə yerli icra hakimiyyəti və özünüidarəetmə orqanları, eləcə də digər rayon təşkilatlarının birgə fəaliyyət istiqamətləri haqqında məlumat verib. O, birinci Avropa Oyunlarına hazırlıq çərçivəsində Nərimanov rayonu ərazisində bir sıra tədbirlərin həyata keçirilməsi istiqamətində işlərin davam etdirildiyini diqqətə çatdırıb.
Ş.İbadov inşa edilən Olimpiya Stadionunun ətrafında, xüsusilə Ziya Bünyadov prospekti boyu ərazilərdə geniş abadlıq və quruculuq işlərinin aparılması istiqamətində müvafiq tədbirlərin keçirildiyini bildirib. O, hazırda “Bakı-2015” birinci Avropa Oyunlarına daxil olan idman növlərinin rayonun idman ictimaiyyəti, tələbə və şagirdlər arasında təbliğ edilməsi, rayondan seçilmiş könüllülərlə işin qurulması, onlarla sıx əməkdaşlığın aparılması yönündə müvafiq tədbirlərin həyata keçirildiyini vurğulayıb. Avropa Oyunları ərəfəsində yarışlara vəsiqə qazanmış idmançılarla görüşlərin keçirilməsi, ölkəmizə gələn idmançılar və turistlər üçün mədəniyyət və istirahət parklarında mədəni-kütləvi tədbirlərin təşkilinin nəzərdə tutulduğunu qeyd edib.
Fövqəladə Hallar Nazirliyinin Bakı Regional Mərkəzinin rəis müavini Tale Şamçıyev təqdimatla çıxış edərək, birinci Avropa Oyunlarının keçirilməsi müddətində birgə fəaliyyət istiqamətləri ilə bağlı məlumat verib.
“Bakı-2015” birinci Avropa Oyunları Əməliyyat Komitəsi Təhlükəsizlik Departamentinin direktoru Peter Aşvin Avropa Oyunlarına hazırlıq və yarışların keçirilməsi müddətində idmançıların və digər xarici qonaqların təhlükəsizliyinin təmini istiqamətində görülən işlər barədə məlumat verib.
Tədbirdə rayonun Fövqəladə Hallar Komissiyasının yerli özünüidarəetmə orqanlarının, mülki müdafiə xidmətlərinin, idarə, müəssisə və təşkilatlarının rayonda əhalinin və ərazinin fövqəladə hadisələrdən mühafizəsini təmin etmək üçün mülki müdafiə işinin tədrisi, təşkili, baş verə biləcək fövqəladə hadisələrin qarşısının alınması ilə bağlı Fövqəladə Hallar Nazirliyi və nazirliyin yerli orqanı olan Nərimanov Rayon Fövqəladə Hallar və Mülki Müdafiə şöbəsi ilə daim qarşılıqlı surətdə fəaliyyət göstərərək operativ tədbirlərin həyata keçirilməsinə hər an hazır olmalarının vacibliyi vurğulanıb, həmçinin gələcəkdə bu cür əməkdaşlığın daha da məqsədəmüvafiq formada davam etdiriləcəyinə əminlik ifadə olunub.