Bakı, 31 mart, AZƏRTAC
Azərbaycan Milli Elmlər Akademiyasının Məhəmməd Füzuli adına Əlyazmalar İnstitutunda 31 Mart - Azərbaycanlıların Soyqırımı Günü ilə bağlı yığıncaq keçirilib.
İnstitutdan AZƏRTAC-a bildiriblər ki, tədbirdə bu elm müəssisəsi direktorunun elmi işlər üzrə müavini, filologiya elmləri doktoru Paşa Kərimov 31 mart hadisələrinin, erməni millətçilərinin xalqımıza qarşı törətdikləri digər cinayətlərin ifşa edilməsi, onlara dair tarixi sənədlərin, əsərlərin, şahidlərin qeydlərinin ortaya çıxararılaraq nəşr edilməsi sahəsində Əlyazmalar İnstitutu əməkdaşlarının fəaliyyəti barədə məlumat verib.
İnstitutun şöbə müdiri, filologiya üzrə fəlsəfə doktoru Mehri Məmmədova və başqaları erməni faşistlərinin Azərbaycan xalqına qarşı cinayətlərinin uzun müddətdən bəri davam etdiyini vurğulayıblar.
Natiqlər 1918-ci il 31 mart hadisələrinin ictimaiyyətə çatdırılması sahəsində ölkəmizin müxtəlif elm və tədris müəssisələrində çalışan tədqiqatçıların gördüyü işlərdən söz açıblar.
Bildirilib ki, Azərbaycan alimləri erməni millətinin xalqımıza qarşı törətdikləri cinayətləri ifşa etmək sahəsində hələ bundan sonra çox iş görməlidirlər.