Bakı, 25 mart, AZƏRTAC
Aprelin 8-də Azərbaycan Dövlət Akademik Opera və Balet Teatrında “Astana Balet” teatrı kollektivinin çıxışı olacaq.
Opera və Balet Teatrının mətbuat xidmətindən AZƏRTAC-a bildirilib ki, Bakıda təqdim olunacaq proqram “Şərq rapsodiyası” adlanır və müxtəlif stillərdə olan nömrələrdən ibarətdir. Proqrama ayrı-ayrı xalqların koloritini əks etdirən parlaq rəqslər daxil edilib. Rəqslərin quruluşu qazax və xarici baletmeysterlər tərəfindən həyata keçirilib.
“Şərq rapsodiyası”nın proqramında N.Rimski-Korsakov, Q.Qarayev və A.Borodin kimi dünya klassiklərinin musiqiləri, həmçinin milli xoreoqrafik kompozisiyalar – “Kus-Jolı”, “Kız Jibek”, “Qazax valsı” və s. nömrələr səslənəcək.
“Astana Balet”in kollektivi maraqlı yaradıcı layihələrlə bir sıra ölkələrdə çıxış edib. Bu kollektivin tamaşaçıları arasında müxtəlif nəsillərin nümayəndələri var.