Şəki, 23 mart, Mustafa Dadaşov, AZƏRTAC
“Ölkəmizi tanıyaq” tur-aksiyası çərçivəsində respublikamızın şimal-qərb bölgəsinə ekskursiyamız olduqca maraqlı keçir. Bu gün Azərbaycanın memarlıq incilərindən olan Şəki xanlarının sarayı ilə tanış olduq. Bu saray kitablarda oxuduğumuzdan, şəkillərdə gördüyümüzdən də gözəldir. Abidə barədə ətraflı məlumat əldə etdik. Ölkəmizin ən məşhur memarlıq abidələrindən biri ilə tanış olduğumuza görə çox sevinirik.
Bu sözləri “Ölkəmizi tanıyaq” tur-aksiyasında iştirak edən Naxçıvan Muxtar Respublikasının Ordubad şəhər 3 nömrəli tam orta məktəbin 11-ci sinif şagirdi Gültac Nəsirova Şəkidə AZƏRTAC-a müsahibəsində söyləyib.
Aksiya iştirakçısı daha sonra deyib: “Belə layihələr ölkəmiz haqqında biliklərimizin artmasına çox yaxşı təsir göstərir. Marşrut boyu bölgələrimizin necə sürətlə inkişaf etdiyinin canlı şahidi olduq. Şəki qədim şəhər olmaqla bərabər, həm də, müasir, abad və gözəldir. Şəhərin təmizliyi çox xoşumuza gəldi”.
Ordubad məktəblisi onlara belə bir imkan yaratdığına görə Prezident İlham Əliyevə məktəblilər adından minnətdarlığını bildirib.