Praqa, 23 mart, AZƏRTAC
ABŞ-ın “Dragoon ride” adlanan hərbi konvoyu martın 29-dan aprelin 1-dək Çexiya ərazisində olacaq. Bununla əlaqədar, Çexiya ordusu həmin müddətdə provokasiyalar törədilə bilməsi güman olunan yerləri müəyyən edib.
Çexiya ordusunun Baş Qərargahı rəisinin müavini Frantişek Maleninski mətbuat konfransında bu haqda məlumat verərək bildirib ki, əgər müəyyən yerlərdə provokasiyalar hazırlanması haqda orduya vaxtında siqnal daxil olsa, belə yerlərdən yan keçmək üçün ehtiyat dolama yollar var.
Qeyd edək ki, bununla əlaqədar, İnternetdə “Amerika konvoyunu dayandıraq” adlı petisiya yayılıb.
Müdafiə naziri Martin Stropnitski konvoyun izlənməsinə ehtiyac olmasını şübhə altına alan debatları “Şveykin uydurmaları” adlandırıb.
Müdafiə Nazirliyinin başçısı vurğulayıb: “Çexiya demokratik dövlət kimi NATO-a öz istəyi ilə daxil olub və ən yığcam, ən səmərəli müdafiə qurumu yaradan demokratik ölkələr birliyinin üzvü olub. Beləliklə Çexiya özünün misilsiz mühafizəsini təmin edib”.
Müttəfiqlərin hərbi bölmələrinin Çexiya ərazisinə daxil olmasına Prezident Miloş Zeman da razılıq verib.
Tərkibində təxminən 516 hərbi qulluqçu və 118 vahid hərbi texnika, əsasən təkərli nəqliyyat vasitələri olacaq konvoy “Atlantic Resolve” əməliyyatı çərçivəsində keçirilən təlimlərdən sonra Plzendən üç yol üzrə Almaniyaya keçəcək.

Pərvanə Qarayeva
AZƏRTAC-ın xüsusi müxbiri
Praqa