Səhər saatlarından prezidentin imzaladığı əfv sərəncamının icrasına başlanıb.

ANS TV-nin məlumatına görə, 4 saylı qadın cəzaçəkmə müəssissində sərəncam 6 qadına şamil olundu. Himayəsində azyaşlı uşağı ilə birlikdə cəza çəkən daha bir qadın azadlığa buraxıldı. Şəhla Muxtarova Ümid adlı körpəsini Gəncə təcridxanasında dünyaya gətiribmiş. 5 uşaq anası Novruz bayramını yaxınları ilə birgə qeyd edə biləcək.

Əfv edilən Şəhla Muxtarova oğlunun sayəsində bu məhkumluq həyatına tab gətirdiyini deyir.

Himayəsində azyaşlı uşaqları olan daha bir məhbus ana Solmaz Bayramova da azadlığa qovuşdu. Ailə münaqişəsi zəminində həyat yoldaşını qətlə yetirən bu xanım həbsxanaya düşəndə, 2 övladı 2 saylı uşaq evinə verilibmiş. İndi onun ilk işi övladlarına qovuşmaq, onları uşaq evindən çıxarmaq olacaq

Əfv edilən Solmaz Bayramova da uşaqları üçün yaşadığını deyir.

Digər əfv edilən Şahnaz Abdürrəhmanova isə söyləyir ki, psixoloji problemlərinə görə doğma bacısına xəsarət yetiribmiş. O isə düşünür ki, ilk növbədə müalicə almalıdır.

Əfv edilən Şahnaz Abdürrəhmanova azadlığa çıxan zaman mütəmadi müalicə alacağını qeyd etdi. O bildirdi ki, 4 il 6 ay cəzasını çəkib. Amma 1 il 6 ayı isə əfv edilib.

Qadın cəza çəkmə müəsisəsində əfv edilənlər arasında korrupsiya faktına görə, həbs edilən Kürdəmir rayon Sosial Müdafiə Mərkəzinin rəis müavini də var. 8 il iş alan xanım cəzasının 3 ildən bir qədər artığını çəkəndən sonra azadlığa çıxır. Bu barədə danışmaq istəməyən keçmiş rəis müavini İradə Abbasova əməlinə görə peşimandır.

Əfv sərəncamı ümumilikdə 101 nəfər şamil edilib.

Penitensiar xidmətin rəis müavini Rafiq Ramazanov bildirdi ki, bu Azərbaycan Respublikasının müstəqillil əldə etdikdən sonra 59-cu əfv fərmanıdır. Bu isə indiyədək 6100 nəfərin azadlığa buraxılması deməkdir.

Əfv ərizəsi yazan Demokratiyanın Tədrisi Mərkəzinin icraçı direktoru Bəşir Süleymanlı, ilahiyyatçı Anar Qasımlı, 2012-ci ildə Təhsil Nazirliyi qarşısında “Hicaba azadlıq” adı ilə keçirilən aksiyada tutulan Ramil Vəliyev və NİDA Vətəndaş Hərəkatının üzvü Orxan Eyyubzadə də azadlığa çıxıb.

Mənbə
ANS TV