Bakı, 19 mart, AZƏRTAC 
Milli Məclisin deputatları Asim Mollazadə, Muxtar Babayev və Aslan Cəfərov martın 14-18-də Braziliyada səfərdə olublar.
Azərbaycanın Braziliyadakı səfirliyinin məlumatına görə, səfər çərçivəsində nümayəndə heyəti bu ölkənin elm, texnologiya və innovasiyalar naziri Aldo Rebelo ilə görüşüb. Azərbaycanın Braziliya ilə dostluq münasibətlərinə malik olduğunu söyləyən Aldo Rebelo əməkdaşlığa hazır olduqlarını bildirib. O, Azərbaycanın regionda aparıcı rolunu vurğulayaraq elm, texnologiya və innovasiyalar sahələrində əməkdaşlıq potensialının olduğunu diqqətə çatdırıb.
Sonra nümayəndə heyətinin Braziliya xarici işlər nazirinin müavini Karlos Paranyosla görüşü olub. Görüşdə iki ölkə arasında siyasi, iqtisadi və humanitar sahələrdə əlaqələrin cari vəziyyəti və perspektivləri müzakirə edilib.
Azərbaycan nümayəndə heyəti Braziliya parlamentinin Deputatlar Palatasında da bir sıra görüşlər keçirib. Parlamentarilərimiz əvvəlcə Braziliya Deputatlar Palatasının plenar iclasında olublar. İclasda Deputatlar Palatasının sədri Eduardo Kunyo bu səfərin parlamentlərarası əlaqələrə töhfə verəcəyini söyləyib. Deputatlar Palatasında Azərbaycan-Braziliya dostluq qrupunun rəhbəri Klaudio Kajado Azərbaycan parlamentarilərinin ilk səfərinin əhəmiyyətinə toxunub. O, Azərbaycanın Braziliya üçün vacib tərəfdaş olduğunu vurğulayıb.
Nümayəndə heyətinin Deputatlar Palatasının birinci vitse-prezidenti Valdir Maranyao ilə görüşündə Azərbaycan və Braziliya qanunverici orqanlarının əməkdaşlığının genişləndirilməsi perspektivləri ətrafında fikir mübadiləsi aparılıb.
Klaudio Kajado ilə keçirilmiş görüşdə isə parlamentlərarası əlaqələrin inkişafı, bu xüsusda dostluq qruplarının təmaslarının gücləndirilməsi, habelə siyasi, iqtisadi, ticarət, humanitar, mədəniyyət, təhsil sahələrində əməkdaşlığın gücləndirilməsində qanunverici orqanların rolu müzakirə olunub.
Milli Məclisin üzvləri Braziliya Deputatlar Palatasının xarici əlaqələr komitəsinin sədri Jo Moraes ilə də görüşüb. Söhbət zamanı deputatlarımız iki ölkə arasında əməkdaşlığın prioritet istiqamətləri, habelə ölkəmizin xarici siyasəti, Ermənistanın Azərbaycana qarşı hərbi təcavüzü barədə məlumat veriblər. Jo Moraes Azərbaycanın Braziliya üçün dost ölkə olduğunu vurğulayaraq qarşılıqlı faydalı əməkdaşlığın qurulmasında maraqlı olduqlarını və Azərbaycanın regionda aparıcı rol oynadığını söyləyib.
Braziliya Prezidentinin xarici məsələlər üzrə müşaviri Marko Aurelio Qarsiya ilə keçirilmiş görüş zamanı ikitərəfli əməkdaşlığın perspektivləri, regional vəziyyət müzakirə olunub.
Səfər çərçivəsində parlamentarilərimiz Braziliyanın inkişaf, sənaye və xarici ticarət nazirinin müavini İvan Ramalyo ilə də görüşüb. Azərbaycanın sürətli iqtisadi inkişafı və əldə edilən nailiyyətlər barədə məlumat verən deputatlar ticarət sahəsində əlaqələrin genişləndirilməsinin zəruriliyini qeyd ediblər. Ölkələrimiz arasında energetika, kənd təsərrüfatı, turizm, informasiya texnologiyaları və digər sahələrdə əməkdaşlıq üçün potensialın olduğu diqqətə çatdırılıb və İ.Ramalyo Azərbaycana səfərə dəvət edilib.
Braziliya Senatının xarici əlaqələr komitəsinin sədri Aloiza Nunyeslə görüşdə isə parlamentlərarası əlaqələrin genişləndirilməsi, həmçinin beynəlxalq və regional məsələlər diqqət mərkəzində olub.
Görüşlərdə Azərbaycanın Braziliyadakı səfiri Elnur Sultanov da iştirak edib.