İstanbul, 18 mart, AZƏRTAC
Xəbər verdiyimiz kimi, Azərbaycan Respublikasının baş prokuroru Zakir Qaralovun rəhbərlik etdiyi nümayəndə heyəti Türkiyədə səfərdədir.
Səfər çərçivəsində İstanbula gələn nümayəndə heyəti şəhərin Sarıyer rayonunda Heydər Əliyev Parkını ziyarət edib. Ziyarətdə Türkiyənin baş prokuroru Hasan Erbil, Azərbaycanın İstanbuldakı baş konsulu Həsən Zeynalov və digər rəsmi şəxslər də iştirak ediblər. Ümummilli lider Heydər Əliyevin parkdakı heykəli önünə gül dəstələri qoyulub, xatirəsi ehtiramla yad edilib.
Sonra Türkiyə Cümhuriyyətinin banisi Mustafa Kamal Atatürkün həmin ərazidəki heykəli önünə tər güllər düzülüb, xatirəsi anılıb.
Daha sonra İstanbulun baş prokuroru Hadi Salihoğlu ilə görüş olub. H.Salihoğlu Azərbaycanla Türkiyənin prokurorluq orqanları arasında əlaqələrin əhəmiyyətindən danışıb.
Baş prokuror Zakir Qaralov Azərbaycanda prokurorluq orqanlarının fəaliyyəti, bu sahədə aparılan islahatlar, cinayətkarlıqla mübarizəyə dair görülən işlərdən bəhs edib.
Görüşdə ölkələrimizin prokurorluq orqanları arasında əlaqələrin yüksək səviyyədə olduğu bildirilib, bu sahədə əməkdaşlığın daha da inkişaf etdirilməsinə dair səmərəli fikir mübadiləsi aparılıb.
Söhbət zamanı martın 17-də Qarsda TANAP-ın təməlqoyma mərasiminin keçirilməsi məmnunluqla xatırlanıb. Əminliklə qeyd olunub ki, Azərbaycan Prezidenti İlham Əliyevin və Türkiyə Prezidenti Rəcəb Tayyib Ərdoğanın siyasi iradəsi ilə Çanaqqala zəfərinin 100-cü ildönümü və Novruz bayramı ərəfəsində keçirilən bu tədbir ölkələrimizə və xalqlarımıza böyük fayda gətirəcək.
Sabir Şahtaxtı
AZƏRTAC-ın xüsusi müxbiri
İstanbul