Lənkəran, 18 mart, Bağır Əliyev, AZƏRTAC
Naxçıvanlı məktəblilər ilk dəfədir Azərbaycanın cənub bölgəsində olurlar. Səfər proqramımız çox zəngindir. Dörd gün ərzində Astara, Lənkəran və Lerik rayonu ilə yaxından tanış olmaq imkanı əldə etmişik.
Bu sözləri AZƏRTAC-a müsahibəsində “Ölkəmizi tanıyaq” layihəsi çərçivəsində Azərbaycanın cənub bölgəsinə təşkil edilmiş tur-aksiyanın qrup rəhbəri, Naxçıvan şəhər 13 nömrəli tam orta məktəbin müəllimi Famil Abdullayev bildirib.
O deyib: “Azərbaycanın bölgələri ilə tanışlıq şagirdlərin Vətənimizə olan sevgisinin daha da artmasına, vətənpərvərlik ruhunda böyüməsinə təsir edəcək, onların mənəvi inkişafında müsbət rol oynayacaq. Gənc nəslin Vətənə məhəbbət, Azərbaycan xalqının tarixinə, mədəni irsinə, dövlət dilinə və rəmzlərinə, milli-mənəvi dəyərlərinə hörmət ruhunda tərbiyə olunması ölkəmizin gələcəyi üçün çox böyük əhəmiyyət kəsb edir. Məktəblilər üçün belə bir imkan yaratdığına görə tur-aksiyada iştirak edən şagird və müəllimlər adından dövlətimizin başçısına minnətdarlığımı bildirirəm”.