Bakı, 18 mart, AZƏRTAC
İsrailin Baş naziri Binyamin Netanyahunun “Likud” partiyası knessetdə İsahq Hersoqun “Sionist düşərgəsi”ndən 6 yer çox ala bilər. Bu barədə martın 17-də keçirilən növbədənkənar parlament seçkilərinin ilkin nəticələri əsasında Haaretz qəzeti məlumat yayıb.
AZƏRTAC TASS informasiya agentliyinə istinadla xəbər verir ki, bir qədər əvvəl ekzit-pollun məlumatına əsasən “Likud”la “Sionist düşərgəsi”nin hər birinin parlamentdə eyni sayda – 27 yer alacaqları deyilirdi.
Mərkəzi Seçki Komissiyası indiyədək bülletenlərin 99,5 faizinin hesablandığını bildirir. Hazırkı nəticələrə görə Netanyahunun partiyası parlamentdə 29 yer qazanaraq 24 yerə malik Hersoqun tərəfdarlarını qabaqlayıb. Onların ardınca Birləşmiş Ərəb Partiyası (14 yer), “Eş Atid” (11 yer), “Kulanu” (10 yer), “Yəhudi evi” (8 yer), ŞAS hərəkatı (7 yer), “Tövrat qoruyucuları hərəkatı” (7 yer) gəlir. Aviqdor Libermanın başçılıq etdiyi rusdilli yəhudilərin “İsrail bizim evimizdir” partiyası səslərin 6 faizini ala bilib.
Mərkəzi Seçki Komissiyasının məlumatına əsasən seçkilərdə seçicilərin 71,8 faizi iştirak edib ki, bu da son on illərin rekord göstəricisidir.
Seçkilərin yekun nəticəsi martın 25-də parlamentin rəsmi jurnalında dərc olunmalıdır. İsrailin prezidenti Reuven Rivlin knessetə seçilən partiya nümayəndələri ilə məsləhətləşmədən sonra deputatlardan birinə yeni hökuməti formalaşdırmağı həvalə edəcək.